ازاى تثبت بنت

احنا عايزين نكلمكم على فن لازم يبقى عند الشاب الروش اللي موجود اليو مين دول اصحو كدة معايا يا شباب ..

في مؤتمر في سوسرا لبحث كيفية تثبيت البنات تقدم احد العلماء ببحث في تأثير حركة العين الشمال عند الولد على عملية التثبيت و توصلا في البحث ان البنت اول حاجة بتلاحظها في الولد حركة النني و عدد شعرات الرمش ،

لذلك لا بد ان تحرص على تدريب عضلة النني من اربع الى خمس ساعات يوميا مع اتباع نظام غذائي محدد علشان تعرف تثبت حريم ، مش عايز اتوهكم و ادخل في مسائل علمية لاني عارفكم مش فاهمين في الحوارات دي............ .... يعني اول ما تشوف البت تروح يا معلم مشغل العضلة الشمال للني و تغمز غمزة اتنين قدم و نص بزاوية 27 درجة و تروح قايل ليها ( لو سمحت ممكن دقيقتين من وقتك؟) اول ما تسألها السؤال ده اللي هيحصل كالأتي :

الاحتمال الاول :انها تقول نعم و ده بنسبت 65% و هيترتب عليه اللي هنقوله بعدين ، الاحتمال الثاني:انها طبعا تقول لا و ده بنسبة 80 % و محدش يسألنتي ازاي و هيترتب عليه اللي هنقوله بعدين برده... و فيه طبعا اخر احتمال بنسبة 100% ان هي هتبصلك بقرف و مدام بصتلك بقرف يبقى انت مفهمتش موضوع العضلة...

نرجع للاحتمال الاول انها تقول نعم ترد انت تقول نعم الله عليكي هتقولك خير قولها خير ان شاء الله و تشغل العضلة بس اتوصى و اتكا عليها شوية هتقولك مال عينك ؟ قولها خناقة و بكده تصعب عليها تروح هيا مكلماك و تظبط يا معلم عيش بقى بس عرفني على بنت خالتها .

الاحتمال الثاني انها تقول لا في الحالة دي بقى عايزة تتكلم بس هي بتتقل و مدام تقلت يبقى خرشمت و موضوع العضلة صعب في الحالة دي اذن مفيش غير موضوع انا كنت عرضته في مؤتمر تاني في السنغال الشرقية لان الطريقة دي اثبتت فعالية في تثبيت البنات السود و اللي بيتقلو اللي هي (طريقة 325 جنايات) تقولها بستهزاء و انت بتبتسم ابتسامة ساخرة( ايه التقل ده انتي حاطة في جيوبك ظلط؟) طبعا هي ممكن يغما عليها من دمك الخفيف يا خفيف هتروح انت مدي ميزد كول للاسعاف بالموبيل بتاعك هما طبعا مش هيفهو حاجة من الميزد ده لاكن هي هتفوق و تروح مرميا في حضنك بمجرد انها شافت الموبيل معاك ...و بكده انت بدأت تحط رجلك على طريق التثبيت بس اغسلها بلاش تحط رجلك و هي معفنة و خطي برجلك اليمين ... وابقى قابلني لو اتعرفت على اي بنت ...

عموما فيه مواضيع كتير عن التثبيت لانها دي در اسة وعلم و في مقالات هتنزل في المستقبل القريب منها (التثبيت بالعربية) وثبت نفسك بنفسك)و (ثبت صنم ) و (شكل توكت الحزام و تأثيره على البنت)....

خلي بالكم فيه باب رائع بعنوان التثبيت بالموبيل حاليا بالاسواق شرايط و سي دى

خليك فى حــــــــالك

جملة مقدسة عند كل أب و أم مصريين عند تربية ولادهم ... و لأن معظمنا شباب تيكي تيكي و بنسمع كلام مامى و دادى فاحنا مش بس هنمشى جنب الحيط داحنا هنمشى جوة الحيط كمان و مش هننبش فى مشاكلنا و لا هندور على أسباب المشكلة و لا حتى هنحاول ندور على العلاج موضوعات سلسلتنا من الآخر ..ترسيخ للشعار المصرى القديم ( اللى ممكن يكون بيرجع للعصر الطباشيرى )

..خليك فى حــالك و أول حلقات سلسلتنا ..آه يــانى .. من البحر الطليـانــى ...

كتير مننا عايش و مش واخد باله من اللى بيجرى حواليه و لأننا متعودناش نقرأ ( كأن القراءة بعبع للشعب المصرى )فمبقاش عندنا قدرة على مجاراة و مواكبة العصرو بقينا زى الإنسان البدائى فى عالم بقت اليونان فيه بتفوز ببطولة أمم أوروبا و بقت فرص تقدمنا بالظبط زى فرص فوز الزمالك بالدورى .

كان لازم أقول الكلمتين الجايين دول مش كلام سياسى على الرغم من مظهره الخارجى لكنهم مفيدين جدا لينا فى موضوعناهتكلم عن عصرين مختلفين لمصرعصر الاشتراكية اللى بدأ بعد الثورة و عصر الرأسمالية الحالى . و طبعا لأن أغلبنا معندوش فكرة عن الاتنينو بالنسباله الرأسمالية و الإشتراكية حاجة كدة زى تارت الكريم كراميل و طائر الرُخ بيسمع عنهم بس و عمره ما جرب حاجة منهم.

الاشتراكية بمعنى بسيط جدا إن النظام الحاكم هو اللى بيبقى معاه كل الفوس و الموارد و الشعب يعيش غلبان و لو عايز أى حاجة أطلب من الحكومة و دا النظام الروسى الشيوعى قبل سقوط الاتحاد السوفيتى و اللى طبقه عبد الناصر فى مصر.

_ الرأسمالية بقى يعنى الاعتماد على النفس و كل مواطن من حقه يبقى معاه فلوس و الحكومة مش ملزمة بحاجة تجاهك اقتصاديا غير انها توفرك سوق الاستثمار و المجال اللى تقدر تحصل منه و تستثمر فيه فلوسك و لأننا كشعب لحد دلوقتى عايشين فى تصور النظام الاشتراكى و مستنيين الحكومة تعملنا كل حاجة ظهر عندنا ظواهر عجيبة مكنتش موجودة قبل كدة أو كانت موجودة لكنها أصبحت بصورة متزايدة رهيبة فى الوقت الحالى

و منها ظاهرة موضوعنا النهاردة : أنا هلم قرشين و أخلع يا عم بقى

كل شاب همه انه يسافر لإعتقاده التام ان مفيش فرص عمل فى مصرو يحاول يدور على أى قرشين يسافر بيهم لو فكر يهاجر بصورة شرعية فى الغالب بتقى مشكلة كبيرة لأن شهادته غالبا بتبقى الثانوية العامة أو دبلوم صنايع و حوارات الفيزا كارد و الكلام دا كله بيبقى صعب و معقد بالنسباله و صعب يخرج من غير عقد عمل فيبدأ يدور على الطريق التانى ..الهجرة غير الشرعية و يستلف أى قرشين من أى حد و يشوف واحد قرارى يسفره إيطاليا أو اليونان و على أى مركب يسافر و يترمى فى البحر قبل الحدود الأوروبية بكام كيلو و هو وشطارته بقى فى العوم و فى التخفى من سلطات الحدود

و طبعا بتفشل العملية لأنه حتى لو دخل البلاد بيبقى طول الوقت هربان و مطارد لأنه مش معاه باسبورت و لا أوراق دخول شرعية فبتحصل كوارث الغرقى اللى بنشوفها دايما و آخرها حادثة أواخر 2007 .

طيب دلوقتى ..ليه الشباب دا بقى بتهون عليه نفسه و بلده بسهولة ؟و بقى تفكيره الوحيد فى تأمين مستقبله هو السفر برة ؟مع علمه بخطورة الموضوع لدرجة ان شاب من اللى نجيوا من الغرق قال ( أهون عليا أموت غرقان و لا إنى أرجع مصر )

_ أنا شايف ان دا مش بسبب الظروف الاقتصادية بس اللى اتكلمت عليها فى البداية الموضوع ليه أبعاد تانية أهمها إننا فقدنا انتمائنا لبلدنا ( أو بمعنى أصح فقدنا الانتماء لكل شىء ) مبقناش عارفين احنا مين و لا عايزين ايه عايشين فى بلدنا أغراب فى حين إن الأغراب ( السياح ) واخدين حقوق أكتر مننا نفسنا ( إحنا أهل البلد )

و دا مالوش غير علاج واحد

انك تبدأ تعرف ايه هى حقوقك كمواطن

انك تعرف انك انت ابن البلد دى

ان انت مصرى

سامعنى كويس ؟

* أى مشروع ناجح لازمله حاجتين :

رأس مال و فكر تخطيطى سليم

و الاتنين موجودين عند شباب مصرلكنهم معندهمش فكرة عن كيفية استخدامهم

اللى عنده رأس مال : بتبقى غالبا دماغه فاضية و مقضيها تفاريح

و اللى عنده فكر : بتبقى مشكلته الكبرى رأس المال

طب الراجل اللى عنده فلوس و مستعد يدفع لشاب 30 ألف علشان يسافرليه ميساعدوش بيهم هنا فى بلده ؟

ليه رجال الأعمال ما يتبنوش مشاكل الشباب و يمولوهم و حتى ياخدوا إيصالات بالمبالغ اللى دفعوها !و الشباب يسددها بعد كدة خصوصا إن حوارات قروض البنوك للشباب حوار سنتيح و مهلبية بالمكسرات ،،،

محتاج رجال أعمال بمنطقنا الإسلامى ( القرض الحسن ) ... دا اليهود فى أستراليا و أغلب الدول بيطبقوا النظام دا ، يتبنوا شباب صغير و يمولوهم و يدوهم خبراتهم و يخلوهم يقفوا على رجلهم و يرجعولهم بعد كدة رأس المال اللى استلفوه بس بدون فوايد ( نظام القرض الحسن الإسلامى ) و كل دا علشان ينضم الشباب لمسمى ( تنظيم الماسونيين الأحرار ) الصهيونى ...ناس عندهم فكرة و عقيدة بيدعولها ( أرض الميعاد ) .

و إحنا أصحاب العقيدة الوحيدة الصحيحة و الفكر القويم لإصلاح كل المجتمعات .. أملنا الوحيد فى الحياة بوسة من صاحبة نظرية ( بوس الواوا )

محتاجين نظرة موضوعية لأسباب مشاكلنا علشان يبقى عندنا نظرة موضوعية أخرى لحلول المشاكل دى ،،،، يا ترى عندك و لا هتمشى جوة الحيط و تخليك فى حالك ؟ بس المشكلة إن إنت مش مخليك فى حالك ... لو كنت مهتم بحالك مكانش بقى دا حالك و لا إيه ؟

مستنى نسمع من بعض و نشوف أرائنا و طرحنا لأسباب مشكلة النهاردة

قبل ما نغرق كلنا .. فى البحر الطليانى ...

حكايـــة نســــر

يُحكى أن نسرا كان يعيش في إحدى الجبال ويضع عشه على قمة إحدى الأشجار، وكان عش النسر يحتوي على 4 بيضات، ثم حدث أن هز زلزال عنيف الأرض فسقطت بيضة من عش النسر وتدحرجت إلى أن استقرت في قن للدجاج، وظنت الدجاجات بأن عليها أن تحمي وتعتني ببيضة النسر هذه، وتطوعت دجاجة كبيرة في السن للعناية بالبيضة إلى أن تفقس. وفي أحد الأيام فقست البيضة وخرج منها نسر صغير جميل، ولكن هذا النسر بدأ يتربى على أنه دجاجة، وأصبح يعرف أنه ليس إلا دجاجة، وفي أحد الأيام وفيما كان يلعب في ساحة قن الدجاج شاهد مجموعة من النسور تحلق عالياً في السماء، تمنى هذا النسر لو يستطيع التحليق عالياً مثل هؤلاء النسور لكنه قوبل بضحكات الاستهزاء من الدجاج قائلين له: ما أنت سوى دجاجة ولن تستطيع التحليق عالياً مثل النسور، وبعدها توقف النسر عن حلم التحليق في الأعاليً، وآلمه اليأس ولم يلبث أن مات بعد أن عاش حياة طويلة مثل الدجاج.

أنك إن ركنت إلى واقعك السلبي تصبح أسيراً وفقاً لما تؤمن به، فإذا كنت نسراً وتحلم لكي تحلق عالياً في سماء النجاح، فتابع أحلامك ولا تستمع لكلمات الدجاج (الخاذلين لطموحك ممن حولك!) حيث أن القدرة والطاقة على تحقيق ذلك متواجدتين لديك بعد مشيئة الله سبحانه وتعالى . واعلم بأن نظرتك الشخصية لذاتك وطموحك هما اللذان يحددان نجاحك من فشلك! لذا فاسع أن تصقل نفسك، وأن ترفع من احترامك ونظرتك لذاتك فهي السبيل لنجاحك، ورافق من يقوي عزيمتك .

قال تعالى: " إن الله لا يغير ما بقوم حتى يغيروا ما بأنفسهم "